Xalq ta’limi vazirligi matbuot xizmati ma’lumotlariga ko‘ra, o‘quv yilining boshida maktablarning kontingentidagi o‘zgarishlar, ya’ni bir maktabdan boshqa maktabga o‘tish tufayli o‘quvchi sonining o‘zgarishi, o‘quvchilar ta’lim olib kelgan maktabida ham, kelayotgan maktabida ham o‘quvchilar soni, ayrim holatlarda hattoki ta’lim tilini o‘zgartirishi holatlari kuzatiladi.

O‘quvchi soni o‘zgarishi (ko‘payishi va kamayishi) maktabda mavjud bo‘lgan darslik fondini ham qayta taqsimlash zaruriyatini yuzaga keltiradi. 

Ma’lumki, darsliklar har yili chop etilmaydi va chop etilgan yilda, maktab buyurtmasiga qarab, foydalaniladigan ijara davri uchun maktabda ta’lim oladigan o‘quvchilar soniga hamda ta’lim tiliga qarab taqsimlanadi. Maktab kontingenti o‘zgarishi o‘z-o‘zidan avvaldan o‘quvchi soni o‘zgarishi dinamikasini aniqlash imkoniyati yo‘qligi sababli, yuzaga kelgan yetishmovchilikni bartaraf etish maqsadida boshqa hududda saqlanayotgan darsliklarni qayta taqsimot qilishga va ehtiyoj yuzaga kelgan maktabga yetkazishga olib keladi. 

Ma’lumot o‘rnida ta’kidlash lozimki, 2021 yilning sentyabrida mamlakatimiz bo‘yicha minglab o‘quvchilarning maktabini o‘zgartirishi sababli shuncha songa mos ravishdagi darsliklarni qayta taqsimlash zaruriyati yuzaga kelgan. 

Albatta, yuzaga keladigan vaziyatda xalq ta’limi vazirligidan boshlab, bevosita hududlarda va maktablarda darslikni taqsimotiga mas’ullarning boshqa hudud (maktab)lardan kerak bo‘ladigan darslik komplektlarini yetkazib berishda tezkorlik bilan harakat qilishlari o‘ta muhim. 

Shu bilan birga ota-onalarning ham bevosita vazirlikning botiga murojaat qilib, muammoli holat bo‘yicha ma’lumot berishlari orqali o‘z farzandlari uchun kerak bo‘ladigan komplektlarni yetkazib berilishida  yordam berishlari mumkin. 

Buning uchun, maxsus telegram-botga – @bookedu_bot murojaat yuborish mumkin. Murojaatda aniq qilib maktabni, yuzaga kelgan masalani bayon etish so‘raladi. 

Qayd etilishicha, ayrim manbalarda 3-, 6-, 7-, 10-sinf yangi darsliklarni o‘quv yili boshidan berilishi yoki berilmasligi bo‘yicha turli talqinlar va fikrlar yuzaga kelishi mumkin. 2022 yil yakuniga qadar darsliklarni yangilash vazifasi 4 ta sinfni qamrab olishi belgilangan. Bundan tashqari, 2022 yilda ingliz, nemis va rus tillaridan Kembridj, Klett nashriyotlari va Gersen nomidagi Rossiya Davlat pedagogika universitetining yurtimiz ta’lim tizimi talablariga mos ravishda  mahalliylashtirilgan darsliklarini joriy qilish rejalashtirilgan. Hozirga qadar, qator yangi darsliklar maktablarga chop etilib, o‘quvchilar uchun foydalanishga tayyor qilib qo‘yilgan.  

Barcha sinf o‘quvchilariga maktab kutubxonasida mavjud tegishli sinf darsliklaridan komplektlarni shakllantirish bo‘yicha ko‘rsatmalar berilgan. Bu borada 6-, 7- va 10-sinf darsliklarini yangilash jarayoni muddati dastlab belgilanganidek yil yakuniga qadar emas, balki oktyabr oyi yakuniga qadar ta’minlanadi.