Yunusobod tumanidagi 235-sonli umumta'lim maktabida 21-mart — Navro‘z umumxalq bayrami munosabati bilan “Xush kelding, Navro‘zi olam!” nomli ma’naviy-ma’rifiy tadbir ko‘tarinki ruhda bo‘lib o‘tdi.

Tadbirda barcha sinf o‘quvchilari faol ishtirok etib, Navro‘z bayramining qadriyatlari, milliy an’ana va urf-odatlarini o‘zida mujassam etgan sahna ko‘rinishlari namoyish etdilar. O‘quvchilar tomonidan ijro etilgan she’rlar, kuy-qo‘shiqlar va milliy raqslar bayramga yanada fayz bag‘ishladi.

Ayniqsa, milliy liboslar jilosi, sahnadagi chiqishlarning rang-barangligi tadbirga o‘zgacha ruh baxsh etdi. Bu kabi tadbirlar yosh avlodni milliy qadriyatlarga hurmat ruhida tarbiyalash, ularning iste’dod va qobiliyatlarini namoyon etishda muhim ahamiyat kasb etadi.

Tadbirda maktab ma’muriyati, ustozlar  ishtirok etib, o‘quvchilarning chiqishlarini yuqori baholadilar. Bayram barchaga ko‘tarinki kayfiyat, quvonch va iliq taassurotlar ulashdi.