O‘zbekiston tarixda ilk bor 38-Xalqaro informatika olimpiadasi (IOI 2026)ga mezbonlik qilmoqda. Mazkur nufuzli xalqaro olimpiadaga tayyorgarlik jarayonlari, tashkiliy ishlar va kutilayotgan natijalarga bagʻishlangan matbuot anjumani boʻlib oʻtdi.

Unda Maktabgacha va maktab taʼlimi vazirining birinchi oʻrinbosari Sherzod Karimov, Raqamli texnologiyalar vaziri oʻrinbosari Rustam Karimjonov, Fan olimpiadalari markazi direktori To'raboy Shermatov,  Raqamli taʼlimni rivojlantirish markazi direktori Azamat Eshankulov ishtirok etib, IOI 2026'ning Oʻzbekiston uchun ahamiyati, tayyorgarlik ishlari hamda xalqaro hamkorlik masalalari yuzasidan maʼlumot berdi.

Ma‘lumot o‘rnida: Xalqaro informatika olimpiadasi dunyoning eng nufuzli intellektual musobaqalaridan biri boʻlib, har yili yuzlab iqtidorli yoshlarni bir maydonga jamlaydi.

Joriy yilda mazkur olimpiadada 97 dan ortiq davlatdan 745 nafar ishtirokchi qatnashishi rejalashtirilgan. 

IOI 2026 nafaqat yosh dasturchilar oʻrtasidagi bilimlar bellashuvi, balki Oʻzbekistonning raqamli taʼlim, innovatsiyalar va xalqaro ilmiy hamkorlikdagi salohiyatini dunyoga namoyish etadigan muhim voqea boʻladi.